دواء الروكتان Roaccutane لمعالجة حبوب الوجه

حبوب الروكتان هي حبوب لمعالجة حبوب البشرة
اسمها ايزوترتونين لكن انعرفت باسم الروكتان نسبة للشركة اللي كانت تصنعها اول شي
اسمها بالواقع ينطق
"رو اكيوتين"
Roaccutane
عن نفسي استخدمت كورانكي وهي نفسها الروكتان بس الاختلاف بالمسمى



نوع بشرتي

بشرتي مو مرا دهنيه .. اعتبرها عادية

 بس ممكن مع الصيف والحر تدهن خصوصا خشمي يصير لمبه ههه

ومع الشتا تقلب جافة خصوصا خدودي

قصتي مع الحبوب

انا انسانه كنت اعاني من الحبوب من يومي عمري ١٢ سنه

.. حبوب صغيره براس ابيض ماتآلم بس احيان يكون حول الحبه ملتهب واحمر ..

يعني قبل حتى ما ابلغ بدت تطلع لي حبوب وكلها كانت ف جبهتي وجبهتي بس

وازمتني بشكل مو طبيعي لان محد بعمري بوجهه نفس اللي بوجهي

والكل كان يقولي وش فيه وجهك ايش صار فيك ويا الله كان شي جدا يحرجني

بعدها مع مرور السنين بدت تصفى جبهتي والحبوب شوي شوي تنزل ع خدودي

بس مش ع خدودي لا ع الجوانب بس قريب اذني

يعني كذا مكان كنتور الوجه

وظليت كذا كل مالها الحبوب تنزل وتنزل تحت ليمن وصلت لذقني

بس اللي جدا غريب انو اكثر مكان دهني بوجهي هو 
خشمي 
مع ذلك ماعمري ابدا طلعت لي حبه بخشمي!

 حاليا تقريبا وصلت لنص العشرين سنة وللاسف 

الحبوب مش حبوب مراهقة

او الاسم اللي يستفزني (حب الشباب)هههه

ومازالت الحبوب تطلع وتطلع ماوقفت

 الحبوب وصلت ل خط ذقني وبديت نوعا ما افهم لحبوبي وافهم ايش اللي يخليها تطلع 

واقدر اسيطر عليها قد ما اقدر ولكن الا ماتطلع لي حبه ولا حبتين يمين يسار تستفزني

واللي يستفزني مش الحبوب نفسها .. الاثار اللي تجلس بعدها

.. الاثار بوجهي تطلع كذا زي البقعه بالبدايه تكون حمرا وشوي شوي تقلب بنيه وبعدين مع التقشير تفتح وتروح ..

الاثار اللي بوجهها تشبه اللي تطلع لي .. كذا حمرا وبعد شهورر تقلب بنيه شوي شوي تتقشر وتختفي

تجاربي لعلاج حبوب الوجه

جربت لمن كنت مراهقة رحت لدكتورة جلدية

 ولمن رحت امريكا كان عمري حدود ١٩ سنه و رحت لدكتورة جلدية جدا مشهورة بنيويورك 

والاثنين اعطوني كريمات  ووغسولات وحوسه

و للاسف مانفعتني كثير

ما اقول مانفعتني ابدا بس اقول مفعولها كان مؤقت يعني

وهذا اللي كان يستفزني بالحبوب بوجهي

اني الاقي المنتج واسميه هذا المنتج المعجزه اللي خلصني من الحبوب واخيرا

لكن

يافرحة ماتمت ههه

كلها كم شهر ويصير هذا الغسول او الكريم
 كآنه ماي ماياثر ببشرتي ابدا

اكتشفت بعدها انو طبيعة بشرتي تتعود ع الكريمات وخلاص لازم اغير باستمرار

تقدروا تقولون جربت كل شي

سواء طبي من دكتوره 

من الصيدليه ع الرف اشتريه

خلطات وخبصات وبطيخ

جربت اعتني ببشرتي بزيادة مانفع

جربت اهملها وما اعطيها وجه مانفع

جربت كل شي ممكن يخطر ع بالك

من كثر ما تآزمت نفسيا

استغفر الله الناس تصلي تدعي تتوفق وتنجح باختبارها

انا ااصلي ادعي ياربي ارفع عني ابتلااء الحبوب بوجهي

بجد بجد مايحس بهذا الشي الا اللي يعاني مثلي كيف انه يحبطك من داخل

حتى لو قلتي الطقاق يبقى بينك وبين نفسك قلبك مكسور وحلمك البشرة الصافيه الزبادي
بس الحمدلله على كل حال

قصتي مع الروكتان ليش كنت مابي اخذه

من زمااااان وانا اسمع فيه وكلما احد يقولي عنه اقول مستحيل ياعمي اخذه

انا انسانه عادي اتقطع من وجع راسي ولا وجع وقتي من الشهر ولا اخذ حبوب

لاني اكره شي اسمه حبوب

اخاف من كل شي
لاني حاطه ببالي لو ايش مانفعني الا مايكون فيه اضرار جانبيه 

ولمن كنت اسمع بتشوهات الجنين مؤكده مع الروكتان يمه يطيح قلبي 
واقول لا مستحيل

واسمع ممكن يسبب فشل كبد وكلى اقول انسوا الموضوع تماما مستحيل ثم مستحيل اعالج وجهي

واخرب كليتي ولا اجيب بكرا بعيد الشر اطفال مشوهين ماتسوى ابدا

كنت دايما اسمع انه دواء خطير واقول مابي اخذه ولا ابي حتى افكر فيه ك خيار

قصتي ليش قررت اخذ الروكتان

سبحان الله الانسان لمن يكبر يتعلم والحمدلله بالعكس سعيده اني عرفت هالشي الحين لان كل تآخيره فيها خيره

بحثت وبحثت وبحثت عن الروكتان والله جلست بالسنين ابحث واراقب ناس كثير تاخذه وامشي معاهم بكورس علاجهم

اتتبع التغييرات ورايهم وكل شي 

اقرا راي دكاترة الجلدية فيه واقرا عن اخطاره والخ

لين تقدروا تقولوا صارت عندي خبره جدا واسعه عن الروكتان وقررت اخذه

هالقرار من وقت كنت ف امريكا ورحت لدكتور وشرحت له حالتي وقلت له كل شي بالتفصيل

شاف وجهي وجلس يسآل ويسآل وهو اللي قالي حلك الوحيد هو الروكتان وباذن الله بتحبيه

بس وقتها كنت اسوي جلسات ليزر لجسمي ودافعه التكاليف كلها مقدم ولمن سآلت قالوا لي فيه خطر

ف ماحبيت اني اخسر فلوس جلسات الليزر ولا حبيت اني اعالج وجهي وبعيد الشر يحترق جسمي مع الليزر بسبب الروكتان

ف قررت استنى وصادف نهاية الجلسات مع نهاية اقامتي ف امريكا

تجربتي مع الروكتان

اول مارجعت السعودية بعدها ب اسبوع بس .. صليت استخاره وبعدها لبست وطلعت المستشفى لدكتورة جلدية

وقتها وجهي كان صافي تماما مافيني ولا حبه بوجهي بس الاثار طبعا كانت حفلة

ف لمن شافت الدكتورة وجهي مارضيت اني انا اخذ الروكتان وقالت ماينفع لك

قلت لها انا ابي اخذه لان الاثار معذبتني اكثر من الحبوب

قالت لي الروكتان مايعالج الاثار

قلت لها بس انه يعالج الحبوب واذا وقفت تطلع الحبوب
 الاثار من نفسها بتروح مع الوقت عكس الحين

وقالت وقلت وقالت وقلت ليمن بالموت اقتنعت وجلست مدري كم تخوفني فيه

جلست تقولي شعرك كله بيطيح ووجهك كله بيجف وعظامك بتوجعك وماتقدري تتزوجي ولا تجيبي اطفال الا بعد ماتقطعيه بسنتين !!! هههه ،،، حاولت تخوفني قد ماتقدر بس انا لاني مو سامعة بنت الجيران تمدح العلاج هذا وجاية ابيه لا انا 

بحثت وبحثت ولي مو اقل من سنتين ابحث عنه وقبلها رحت لدكتور ف امريكا ونصحني فيه

وبين قوسين الدكتور اللي ب امريكا فحص وجهي وجلس يسآل 

هذي حتى وجهي اعطته رمقه سريعه وعلطول كتبت لي صابونه ومش عارف ايش !

قلت لها مابي صابونة ولا ابي كريم لاني عارفه وجربت قبلهم كثير المشكله من جوا مش من برا

سويت التحاليل يومها وكتبت لي الدكتورة الحبوب وكتبت لي عشرين ملقرام

هذا شكل الكرتون

هذا شكل الحبه من داخل

اول شهر

اول شهر عدا علي وانا مو مستوعبه لدرجه شكيت انو الدواء مضروب

لان مافي ولا اي اعراض لا جفاف وجه ولا جفاف شفايف ولا اي شي متغير ابدددااااا
بس حبوب طلعت لي يمكن خمس او ست حبات ووحده منهم كانت توجع !! بس هذا شي طبيع ي مع الروكتان انو اول ماتستخدميه يطلع لك حبوب

الشي الوحيد اللي جد جد تعبني لكن
هو الكآبه !! ماتوقعت ابدااا انه بيآثر ع نفسيتي

بس بجد مجرد بديت اخذه صرت ابكي بشكل مجنون وكل شي يضايقني ويخلي دموعي اربع اربع

ماودي اقوم من السرير ولا ودي اتحرك

بس اسبوع او شي وفكت الكابه الحمدلله

بس للصراحة على نهاية الشهر الاول فجآه عيوني كذا صار زي اللي عليها غشاوة

عارفه كيف لمن تطلعي بنور لمبة عالي وبعدها ماتقدري تشوفي شي ؟؟

ايواا كذا صرت مو قادره اشوف ابدا واغمض وافتح وياهوه وش الحكاية

بس جا بمخي الروكتان وقلت يمكن جفاف وقررت اقطرها بقطرة عادية

وقطرتها من جهة صارت طبيعية جدا من جهة ثانيه !!

هذي نوع القطرات اللي استخدمتها .. جميله ترطب العين 

هذا شكل القطرات من جوا

ثاني شهر

بداية الشهر الثاني الحبوب ما اقدر اقول راحت ولا اقدر اقول موجوده بس المصيبه كان ف بداية المعاناة مع الجفاف

وبدا معي بخشمي جفاف كذا جوا جوا الخشم تحسي ماودك تتنفسي من كثر ماجوا خشمك جاف

بس كنت اعالج هالشي باني اخذ شور دافي ومع رطوبة الماي بالشاور يخف

مجرد خف خشمي بدت شفايفي ويا الله ماودي احكيكم

انا طبيعة شفايفي عادية .. تجف كثير ف ماحسيته شي كبير انو شفايفي بتجف مع الروكتان

بس الجفاف مع الروكتان شي ثاني تماما

من قوة جفاف شفايفي ما اقدر افتح فمي الا كآني فار ههه مرا معاناه اذا جيت اكل ساندويش ولا شي كبير

ولو عاندت وفتحت فمي تنبط وتتشقق من كل حتة ويطلع منها دم

وزاوية الفم بالخصوص

مرطب الشفايف هو سلاحك الوحيد وكل شوي دهني شفايفك فيه وتخف

هذا المرهم العلاجي عجيب للشفايف ،، في منه نوع مخصص للشفايف بس وقت اللي صورت دورته مالقيته
بكل الاحوال انو نفس الشي اللهم هذاك اصغر
يرطب الشفايف كانها مو متشققه ولا جافه
كانه فازلين بس اخف من الفازلين بكثييييير

ثالث شهر

جفاف شفايفي استمر للشهر الثالث
وخشمي وجنب عيني صار جاف لدرجه انه يتقشر

بديت الاحظ شعري ماعاد يزيت ابدااااا لو اخليه اسبوع كآني توي امس غاسلته !!
مالاحظت تساقط غير طبيعي بشعري ولا حسيت بجفاف بس اني كنت اسوي لشعري حمام زيت مره كل اسبوع
بنص الشهر الثالث حسيت العشرين جرام غير مناسبه لي !! وضعيفه
لاني احس بالفرق بوجهي بس ماحسيت بالتغيير الكبير
ووصلت لنص الكورس وباقي مافي اي نتيجة !!
فوق هذا احتماليه انو الحبوب ترجع بعد كم سنه بعد ما تخلصي 
الكورس اكبر لو انك اخذتي ملقرامات صغيره
وابدا ماودي اتعب نفسي الحين علشان ارجع واعيد المعاناه مره ثانيه بعد كم سنة !!
فقررت انو انا ارفع الدوسج واخذ حبتين باليوم
يعني اصير اخد اربعين ملقرام
مجرد بديت اخذ حبيتين باليوم
كل شي رجع من جديد !!!
الكابه رجعت
جفاف الخشم و الشفايف رجع
وطلعت لي كمان مو اقل من خمس حبات بوجهي
وهالمره اغلبهم يوجعوا !!
بس انو خلال اسبوع كل هذا راح ورجع كل شي طبيعي
لا كابه ولا جفاف ولا حبوب ! الحمدلله
وهذا اكثر شي لاحظته وقت العلاج انو حتى لو طلعت حبوب بوجهي
خلال اسبوع تختفي تماما

رابع شهر

جفاف الشفايف جدا خف عن قبل وبشكل عام كل الاعراض خفت
واحس اني ارتحت واستفدت اكثر على الحبتين ف اليوم
 (اربعين ملقرام) 
بشرتي جدا ناعمه ومشدوده كانها بشرة بيبي مافيه حبوب الا يمكن حبه وحده
وتروح بسرعه وتكون مرا صغيره يادوبها تبان
الجفاف ببشرتي باقي موجود بس انه بسيط
وشعري صاير يجنن فيه لمعه تهبل ومايزيت ابدا كانه باروكه ههه
غير كذا ماحسيت باي شي مو كويس

خامس شهر

حاليا انا بالشهر الخامس و وجهي الحمدلله بدت تبان النتايج عليه ويتحسن
وان شاء الله تستمر النتيجة
كاعراض جسميه اكثر شي تعبني هالشهر هو الم في مفاصل رجولي وطبعا هالشي طبيعي واستغربت اني ماعانيت منه من البداية
 بس ماكان الم شديد او شي مانام بسببه بس اني اذا كنت جالسه واقوم بمشي احس بوجع خفيف بمفاصلي و الحمدلله ماطولت

سادس شهر
ان شاء الله الشهر الجاي اجي اكتب وش صار معاي
...


بشكل عام انا سعيده الحمدلله
حاليا سواء حطيت مكياج ولا لا بشرتي تجنن وانا باقي ماخلصت علاج وحتى لمن احط مكياج شكل المكياج يطلع يجنن
الاثار ما اختفت بس خفت بشكل كبير
لانها كانت بقع ف زمان اذا حطيت مكياج احتاج فاونديشن(كريم اساس) بتغطيه عاليه علشان تصير بشرتي صافيه
حاليا بفضل ربي من كثر ماخفت الاثار صار اي فاونديشن يغطيها وتتغطى بسهوله

.......

عنايتي حاليا ما اختلفت كثير اللهم صرت اداري بشرتي اكثر
يعني اول شهر كنت استخدم اي غسول
وكان وقتها غسول طبي من سيراڤي بالسيلاسيلك
" حمض الصفصاف "

CeraVe - renewing SA cleanser

....
 بس على نهاية الشهر صرت احسه يحرق بشرتي و يجففها مرا
ف صرت استخدم غسول سيتافيل لانه اخف ومناسب للبشره الحساسه

Cetaphil - Gentle skin cleanser 

احيان احس سيتافيل مو مرا قوي لوجهي
ف صرت احط بيدي  غسول سيراڤي السيلاسيلك واخففه بغسول سيتافيل
واحس مرتاحه كذا
...
وتقريبا مره كل اسبوعين استخدم هذا المقشر
علشان اساعد بشرتي تتجدد

Acure - brightening facial scrub

بس لاني احس ان بشرتي حساسه ما استخدمه مباشر
اخففه كمان بالسيتافيل واحط شوي من السيتافيل وشوي من المقشر
......

اكثر شي احسه افادني وخلا بشرتي ماتجف مرا هو اني
كل مره اغسلها مباشره ابخها بماي الصبار هذا
يهدي البشره وينعشها ويعطيها ترطيب جدا خفيف
جدا انصحكم فيه سعره حدود ثلاثين ريال في موقع فانيلا

nature republic - aloe vera soothing mist

......

والمرطب اللي اعتمدته لوجهي هو
مرطب من كلين اند كلير مرا خفيف كانه ماي ع الوجه
اول ماتحطينه ع وجهك شوي يحرق كانه نعناع بس
شوي ويروح الاحساس
تتشربه البشره مرا بسرعه والحلو فيه انه يرطب
بنفس الوقت يحمي الوجه عن الحبوب
لي سنين استخدمه ومرتاحه عليه الحمدلله

Clean&Clear - dual action moisturiser

.....
واهم شي اهم اهم شي لعنايتي اني اشرب ماي قد ما اقدر
واشتريت هذا الحجم من الماي علشان الزم نفسي 
اني اخلص وحده كامله ع الاقل ف اليوم

......

وبشكل عام كنت اريح بشرتي احيان
اذا حسيتها نظيفه ما اغسلها لان غسيل الوجه
يشيل الدهون اللي فيه وبشرتك مع الروكتان تنتحر من قلة الدهون
يعني لو غسلت وجهي قبل لا انام .. اول ما اصحى لو حسيت وجهي نظيف ما اغسله

.....

اسئله عامه

هل ينفع اي شخص ياخد الروكتان؟

ما احبذ ياخذه شخص اقل من عشرين سنه

لان الحبوب ممكن تختفي بحالها 

وما انصح فيه ك اول خيار لعلاج الحبوب

اذا جربتي كل شي كل شي وماضبط معاك شي وعمرك فوق العشرين

وقتها انا انصحك فيه
لانه كويس لعلاج الحبوب المزمنه
وكويس لعلاجات الحالات اللي جدااااااااا سيئه لحبوب الوجه

زي الحالة هذي مثلا ممكن تاخذ الروكتان حتى لو بعمر المراهقة لانها حالة جدا سييئة

سؤال: انا جربت اخذت الروكتان ووقفته لانو كان يسبب لي صداع مستمر وماراح الصداع الا لمن وقفت الروكتان

انا شخصيا كان يجيني الصداع مع بداية الروكتان والحل الوحيد حقه اني اشرب ماي كثير

بالروكتان .. اي اعراض تجيك ،، اشربي ماي كثير قد ماتقدري على  مدار اليوم وراح يخف

سواء كان صداع ولا الم ف الكلى حاولي تشربي ماي
بس اذا الم لايطاق وانتي مو مقصره بالماي
اقطعي الروكتان و روحي المستشف
بس لاتقصري بالماي وبعدها ترمي السبب ع المسكين الروكتان

سؤال: انا اخذت الروكتان ووقفته بعد اول شهر لان الحبوب ف وجهي مرا زادت؟
شي جدا طبيعي مع الروكتان واغلب علاجات الحبوب ان وجهك يصير ااسوء قبل لايتحسن فلا توقفي العلاج واستني عليه
كثير مايبدي يتحسن وجههم الا على الشهر الثالث او الرابع


هل الروكتان يعالج اثار البشره؟
للاسف لا .. بس انه يوقف الحبوب تطلع وبطبيعة خلايا البشرة تتجدد
ف اذا وقفت الحبوب بتخف الاثار تدريجيا اذا كانت بقع وتروح باذن الله
بس لو الاثار كانت ك حفر
هذي تحتاج تدخل طبي وكثير يقولون علاجها الليزر


هل ينفع اسوي ليزر ازاله الشعر وانا اخذ حبوب الروكتان؟
يقولون مايصلح لان الجلد يكون مرا حساس
ولانه حساس ممكن يحترق مع الليزر
وفيه اطباء يقولون عادي مايحرق اهم شي مايسوون اي ليزر للوجه
بس للصراحه عن نفسي الخوف ان جسمي يحترق من الليزر واتشوه
خلاني ابطل واقول ماراح اموت لو استنيت
بس كلمتني بنت تاخذ الروكتان وسوت جلسات وتقول عادي ما احترقت ولا صار فيها شي
ف الله اعلم بس الاحتياط واجب

كم مره سويت تحاليل؟

 كل شهرين مره لاني ماكنت احس باي اعراض الحمدلله .. لا الم ولا اي شي غير طبيعي

وانا بطبيعتي ما اكل مآكولات دسمه ف ماكنت خايفه ع الكلسترول يرتفع

بس علشان اتطمن لانو الندم بعدين ماراح ينفع .. اسوي التحاليل علشان اتطمن اكثر
بس لو انتي الكلسترول عندك مرتفع ولا ماباقي له شي ويرتفع ضروري
تسوي التحاليل مره بالشهر
التحاليل سعرها يختلف من مستشفى الى ثاني ويختلف لو عندك تآمين او لا
عن نفسي ماعندي تامين ف كنت ادفع 
٣٥٥ ريال قيمة التحاليل
(مستشفى خاص)

هل ممكن الحبوب بالبشرة ترجع بعدين؟

الروكتان يعتبر حل نوعا ما دائم لعلاج الحبوب

لكن فيه فئه صغيره من الناس بعد كم سنه ترجع لهم الحبوب

وبالغالب هالناس اخذوه مده قصيره ماخلصوا الكورس

او قوته(ملقرام) كانت خفيفه ع جسمهم

ف الجسم يهجد كم سنه بعدها يرجع من جديد يلعب

ووقتها بتحتاجي ترجعي تاخدي الكورس
واغلب الناس بعد الكورس الثاني تختفي الحبوب للابد

ليش ماجربتي تاخذي مضاد حيوي بالاول يمكن ينفع معاك؟
المضاد الحيوي يقتل الجراثيم والبكتيريا جوا الجسم
ف طول ما انتي تاخذينه بتختفي الحبوب
لكن مجرد تقطعيه بيرجع كل شي
وفوق هذا المضاد الحيوي يقتل كل البكتيريا جوا جسمك
وكلنا نعرف ان الجسم يحتاج بكتيريا نافعه
ف يتعب جسمك ولاتستفيدي
ماقد سمعت عن احد عنده حالة حبوب مزمنه
واخذ مضاد حيوي واختفت الحبوب
ف ليش اتعب عمري وجسمي بشي مؤقت !!

كم سعر حبوب الروكتان؟
طول فترة العلاج كنت اخذ كرتون عشرين ملقرام وكان سعره
١١٧ ريال تقريبا
الكرتون فيه ثلاثين حبه
والصيدلاني مايرضى يعطيني الكرتون الا بوصفه من الدكتور

هل الروكتان يعالج حبوب الوجه بس؟
للصراحه مو مآزمني الا حبوب فوجهي
بس تطلع لي حساسيه من الاكل حبوب ف ظهري صغيره
ولاحظت انها اختفت من ثاني شهر ولا رجعت ابدا !!
ومعروف الروكتان يآثر بحبوب الجسم بسرعه وتروح وماعاد ترجع

كم مره ف اليوم ارطب وجهي وجسمي؟
ببداية الشهور كنت جدا مهتمه بعدين للصراحه شوي شوي كسلت
وصرت مو مرا مهتمه وماحسيت بجفاف كبير
لكن فيه ناس كثير يهملوا والروكتان يسبب لهم اكزيما بسبب شدة الجفاف
ف انتبهوا
اما لوجهي صرت احس كلما حطيت عليه شي كلما صار يهيج
ف خليته يولي بدون شي ههههه
والحمدلله ما احس بجفاف شديد


هل ممكن الروكتان يسبب كيس دهني ف العيون؟
ايه ناس كثير يسبب لهم كيس دهني ف العيون
الحمدلله بفضل من ربي ماعانيت من هالشي ابدا

هل ممكن الروكتان يسبب نزيف بالانف؟
ايه ممكن هالشي يصير لان جوا الانف يكون مرا جاف ف ينزف
بس الحمدلله ماعانيت من هالشي
زي ماقلت كنت دايما احاول اجلس بمكان رطب زي الشاور


هل الروكتان يسبب ضعف نظر؟
الروكتان يسبب جفاف بكل الجسم ، جفاف العين الزايد اذا ما اهتميتي
وقطرتي عيونك ترطبيها ممكن ينتج عن هالشي جفاف والجفاف يسبب ضعف نظر
بس كثير يقولون مجرد وقفوا العلاج رجع نظرهم طبيعي


هل ممكن الروكتان يسبب تساقط شعر؟
ايه لكن مجرد توقفي علاج يوقف
وكمان الحمدلله شعري ماتآثر وتساقط

بعد كم من اوقف العلاج ليمن اقدر احمل باطفال سليمين؟
الطب يقول شهر واحد كفايه ان جسمك يتخلص من الروكتان
بس للاسلم تستني شهرين
وفيه كثير يقولون استني ست شهور
لكن حكايه تستني اكثر من ست شهور كلام فاضي
كلمتني بنت انو اختها خلصت الروكتان من جهة
بعدها بشهر صارت حامل والحمدلله بفضل ربي
جابت بنت سليمه زي القمر
ف باذن الله مافيه مشاكل بس الاحتياط واجب

نصايح عامة

الروكتان العنصر الاساسي فيه هو

E فيتامين 

 فيتامين إي من نوع الفيتامينات اللي تذوب ف الدهون

ف لو اخذتي الروكتان مع عصير برتقال مثلا ولا مع سلطة ماراح تستفيدي منه لانه ماراح يذوب

تحتاجي تاخدي كميه دهون بسيطه معاه علشان يذوب ويتحلل ويروح للدم وتستفيدي منه

عن نفسي كنت دايما اخذه مع الغذا لان مستحيل يخلى الغذا من الدهون ههه

بس احيان ما اتغدى ف اخذه مع سندويشة فول سوداني ومربى

...

ضروري مع علاج الروكتان تسوي تحليل دم دوري عند اخصائي الجلدية علشان تتابعي صحتك وتشوفي مستوى الكلسترول
ووظائف الكبد والكلى وغيره من التحاليل اللي يكتبها دكتور الجلدية
ابدا لاتهملي التحاليل هذي !!
......

كونك تاخدي الروكتان هذا مايعني ابدا انك تقدري تلعبي وتاكلي كل اللي ودك فيه وماراح تطلع لك حبوب

لا ابدا !! يعني انا من الناس اللي لو اكل شوكلت تطلع لي حبوب وتوقعت الروكتان خلاص بيحل هذا الشي

بس حاليا وقت انا اكتب التدوينه هذي اقولكم لا ابدا باقي حتى مع الروكتان .. المآكولات اللي تحسس بشرتي باقي تحسس بشررتي واحتاج ابتعد عنها
بس الفرق زمان اكلت ولا ما اكلت باقي تطلع
الحين لو ابتعد عنها خلاص ماتطلع لي حبوب
يمكن بعد ما اخلص الكورس تخف الحساسيه
اذا خلصت الكورس اقولكم ههه

....

طول ما انتي تاخذي الروكتان لاتفكري ابداااا ابدااا انك تتبرعي بالدم
لان دمك يكون حامل للروكتان ولو تبرعتي وبعيد الشر
نقلوا الدم اللي تبرعتي فيه لوحده حامل
المسكينه الجنين حقها مش احتمال الا اكيد ميه بالميه بيطلع مشوه
الله يكافينا ويعافينا من الشر يارب
...

بالمقابل كمان لو انتي متزوجه ضروري تنتبهي لنفسك طول ماانتي تاخذي الروكتان انك ماتحملي
لان زي ماقلت احتماليه تشوه الجنين مع الروكتان اكيده
يسبب تضخم لراس الجنين بشكل غير طبيعي
ف لازم تنتبهي

...

وقت علاج الروكتان ضروري الماي يصير من اساسيات يومك بشكل مكثف
يعني تقريبا تشربي مالا يقل عن لتر واحد في اليوم
واذا قصرتي وشفتي اعراض تزعجك ومشاكل
وقتها لاتلومي الا نفسك لانه تقصير منك


....

بشكل عام انتبهي لبشرتك وقت العلاج لانها تصير جدا حساسه
يعني لاتقشرينها بشي قاسي ولا تستخدمي شي يجفف الوجه
وحاولي ترطبيها كل ماقدرتي

...

لاتبدي اي جلسات او اي علاجات لتقشير البشره
علشان تتخلصي من الاثار وانتي تاخذي الروكتان
لان النتايج بتكون عكسيه
والافضل تستني بعد ماتخلصي الروكتان بشهر الى شهرين
بعدين تبدي العلاج

....


وبكل الاحوال ضروري تستخيري رب العالمين وتوكلي جميع امرك له
واللي فيه صلاح لك .. ربي بيسهله لك وبيسر طريقك
الروكتان مو خطير الا لو استخدم غلط حاله حال اي دواء ف الدنيا
واخيرا الله يحفظنا اجمعين
اذا عندكم اي استفسار او تساؤل اكتبوه ف التعليقات
وبرد عليه بكل اللي اعرفه

....

لو حبيتوا البوست خذوا طله على انستقرامي

Zina_Makeup

https://www.instagram.com/zina_makeup/

.. 

 وضيفوني على السناب انزل نصايح مكياج كثيرة